𝗦𝘂𝗮 𝗘𝘀𝗲𝗹𝗲́𝗻𝘀𝗶𝗮 𝗠𝗶𝗻𝗶𝘀𝘁𝗿𝘂 𝗙𝗿𝗮𝗻𝗰𝗶𝘀𝗰𝗼 𝗱𝗮 𝗖𝗼𝘀𝘁𝗮 𝗠𝗼𝗻𝘁𝗲𝗶𝗿𝗼 𝗥𝗲𝗽𝗿𝗲𝘇𝗲𝗻𝘁𝗮 𝗧𝗶𝗺𝗼𝗿-𝗟𝗲𝘀𝘁𝗲 𝗶𝗵𝗮 𝗘𝘅𝗽𝗼𝘇𝗶𝘀𝗮𝘂𝗻 𝗻𝗼 𝗞𝗼𝗻𝗳𝗲𝗿𝗲́𝗻𝘀𝗶𝗮 𝗜𝗻𝘁𝗲𝗿𝗻𝗮𝘀𝗶𝗼𝗻𝗮́𝗹 𝗯𝗮 𝗣𝗲𝘁𝗿𝗼́𝗹𝗲𝘂 𝗶𝗵𝗮 𝗔𝗯𝘂 𝗗𝗵𝗮𝗯𝗶 (𝗔𝗗𝗜𝗣𝗘𝗖 – 𝗦𝗶𝗴𝗹𝗮 𝗶𝗵𝗮 𝗜𝗻𝗴𝗹𝗲𝘇)

Ministériu Petróleu no Rekursus Minerais anunsia katak, Sua Eselénsia Ministru Francisco da Costa Monteiro, reprezenta hela Timor-Leste iha Expozisaun no Konferénsia Petróleu Internasionál iha Abu Dhabi (ADIPEC – Sigla iha Inglez) husi loron 2 to’o 5 fulan Outubru tinan 2023.

Sua Eselénsia atende eventu ida ne’e, bazeia ba konvite husi Ministru Enerjia no Infraestruturas husi Emirados Arabes Unidos nian, Suhail Mohamed Al Mouzrouei. Eventu signifikante ida ne’e, realiza ho patrosíniu husi Sua Eselénsia Prezidente Emirados Arabes Unidos nian, Sheik Mohammed Bin Zayed Al Nahyan.

Sua Eselénsia Francisco Monteiro, ho previléjiu reprezenta Timor-Leste, iha forúm altu nível no diskussaun meza redonda. Atende mos enkontru nível ministros husi rejiaun Ázia, Europa, Áfrika no Amérika Súl no Norte liu sanulu. Além ne’e, marka mos presenza husi Xefe husi Organizasaun Internasionál sira, Inklui husi OPEC, hodi partisipa iha diskussaun kona-ba regra husi Chatam House “regra ne’ebé regula katak, participante husi reuniaun bele uza informasaun ne’ebé mak nia hetan iha reuniaun ne’e, maibé labele lekar ba ema seluk ne’ebé mak komenta”.

Tema Sentral iha dikussaun ne’e mak importánsia husi tranzisaun enejétika iha dezenvolvimentu ekonómiku, kresimentu no avansu sósiu ekonómiku. Ministru Monteiro iha nia intervesaun subliña importánsia ba rekoñesimentu gás natural hanesan parte ida husi tranzisaun enerjétika krusiál, tanba emisaun karbonu ki’ik liu. Afirma mos katak, nasaun hanesan Timor-Leste tenke explora no dezenvolve nafatin gás natural atu nune’e bele kontribui konsideravelmente ba nesesidade ajustamentu ritmu relasiona ba konstrusaun sósiu ekonómiku kada nasaun nian.

Iha diskurssu abertura iha eventu ne’e, Prezidente Designadu ba COP28 (Konferénsia Nasoes Unidas kona-ba Mudansa Klimátika) no Ministru ba Indústria no Teknoloijia Avansada, husi Emiados Arabes Unidus, Dr. Sultan Ahmed Al jaber deklara katak, “ohin iha ADIPEC iha Abu Dhabi, há’u dehan ho total konfiansa: indústria ne’e bele no tenke ajuda buka solusaun. Kleur ona indústria ida ne’e konsidera hanesan parte husi problema, tanba indústria ida ne’e, la halo buat nato’on, iha kazu balun, dala ruma blokeia progressu. Eventu ida ne’e hanesan oportunidade atu hatudu ba mundu katak, ita sai sentru fundamental ba solusaun”.